Investigadores do Ciberobn, adscritos á Universidade de Navarra e á Universidade de Reus da man de Miguel Ángel Martínez-González e de Jordi Salas, en colaboración coa Universidade de Harvard, dan a coñecer o primeiro gran estudo que valora na poboación estadounidense a relación a longo prazo entre o consumo de aceite de oliva e a enfermidade cardiovascular, sexan infartos de miocardio ou cerebrais. O traballo acaba de publicarse na revista da Sociedade Americana de Cardioloxía.
O equipo de investigación, composto por coñecidos expertos internacionais en nutrición, atopou unha redución relativa dos infartos dun 18% (marxe de confianza, entre 9% e 27%), por cada media cullerada sopeira máis de aceite de oliva consumido, independentemente doutros factores.
O equipo analizou durante 30 anos amplos datos nutricionais e de estilo de vida de máis de 90.000 voluntarios (61.000 mulleres e 32.000 homes), nos que ocorreron 9.797 casos de enfermidade cardiovascular grave. Non foi posible diferenciar entre o aceite de oliva común e o aceite de oliva virxe extra.
Substituír a manteiga, maionesa ou nata por aceite de oliva reduce riscos graves de forma eficaz
Con todo, “outros estudos atoparon que o virxe extra ten maiores beneficios en prevención vascular, probablemente polos seus antioxidantes, polifenoles, vitaminas e outros compostos bioactivos”, explica Miguel Ángel Martínez-González, investigador principal do Ciberobn e coautor do artigo.
O novo estudo publicado na prestixiosa revista Journal of the American College of Cardiology é un argumento para defender que calquera tipo de aceite de oliva constitúe unha magnífica elección para substituír as graxas animais e saturadas en todos os usos culinarios, segundo ambos os expertos do Ciberobn. Un aspecto interesante é a comparación que se fai entre as distintas opcións de graxas. Por exemplo, substituír a manteiga, maionesa ou nata por aceite de oliva demóstrase que reducirá de maneira eficaz o risco de enfermedades cardiovasculares graves.
Aceite de oliva, modelo ideal de graxa culinaria
As investigacións previas sobre aceite de oliva e saúde do corazón realizáronse sobre todo en poboacións mediterráneas. “É unha alegría comprobar que se puideron replicar nas mellores cohortes de Estados Unidos os resultados que levamos anos observando en España. Xa non poden quedar dúbidas de que todos os tipos de aceite de oliva asócianse a un menor risco de enfermidades cardiovasculares. Débese considerar á luz da ciencia actual como o modelo ideal de graxa culinaria”, afirma Martínez-González.
Miguel Ángel Martínez-González.
En 2002 este profesor dirixiu un estudo de casos e controis, que xa atopou grandes vantaxes do aceite de oliva de calquera tipo en cardioloxía preventiva. “Os resultados daquel modesto estudo víronse replicados polo ensaio Predimed con aceite virxe estra, e agora confírmanse de novo en EEUU para todo tipo de aceites de oliva nas dúas grandes cohortes que están a marcar as pautas mundiais dunha nutrición saudable”, conclúe.
O Ciber (Consorcio Centro de Investigación Biomédica en Rede, M.P.) depende do Instituto de Saúde Carlos III –Ministerio de Ciencia, Innovación y Universidades– e esta cofinanciado polo Fondo Europeo de Desenvolvemento Rexional (Feder). O Ciber de Fisiopatoloxía da Obesidade e Nutrición (Ciberobn) é un consorcio integrado por 33 grupos de traballo nacionais de contrastada excelencia científica, que centra o seu labor investigador no estudo da obesidade, a nutrición e o exercicio físico, a fin de xerar coñecemento útil para a práctica clínica, a industria alimentaria e a sociedade no seu conxunto. Esta institución traballa ademáis sobre os beneficios da dieta mediterránea, a prevención de alteracións metabólicas, a obesidade infantil e xuvenil, e a relación entre obesidade e cáncer.
Deixa unha resposta