A partir do curso 2022-2023, o Centro Superior de Hostalería de Galicia (CSHG) impartirá un grao oficial de innovación gastronómica e xestión hoteleira con validez en todo o Estado, como centro adscrito á Universidade de Santiago de Compostela (USC). Trátase dunha titulación universitaria que constará de dous itinerarios diferenciados: un centrado na xestión hoteleira e outro na innovación gastronómica.
A directora do CSHG, Marta Fernández, asume este fito como o resultado de moitos anos de traballo e asegura que supón un “salto de nivel importante”, especialmente no ámbito gastronómico. Así, fíxase como principais retos de futuro converter ao CSHG “nunha referencia a nivel gastronómico”, así como avanzar na internacionalización e no contacto e colaboración co sector.
—Como valora o CSGH a consecución desde novo grao, que terá carácter oficial?
—Para nós é un grande reto, sobre todo no ámbito da gastronomía. É o resultado dun traballo de moitos anos, un resultado merecido e tamén algo moi desexado. Ao longo de todos estes anos a carteira de titulacións que existen a nivel universitario en España teñen nacido competidores que ofertan titulacións dentro do mesmo campo que o CSHG e que teñen o recoñecemento oficial, e nós necesitabamos tamén acceder a isto. Afrontámolo con moitísima ilusión e alegría e, aínda que hai moito traballo feito, é o principio do camiño. O título ten redactada a súa memoria, conta cun plan de estudos definido e agora o que falta é toda a tramitación.
—Que achegará este novo grao a Galicia?
—Una sociedade formada é unha sociedade que pode avanzar. As nosas titulacións actualmente teñen alumnos, pero o feito de que sexan recoñecidas oficialmente permítenos ser máis competitivos a futuro e seguir contando con alumnos en primeiro curso. Agora non hai ningunha titulación universitaria en Galicia a nivel gastronómico, cando si existe noutros territorios. E que está a ocorrer agora? Que algúns dos nosos posibles alumnos están a estudar fóra. Pero o novo grao é importante non só por poder captar o talento aquí, senón porque os profesionais do sector da restauración tamén necesitan un centro de referencia a nivel gastronómico, que poida ser un centro transversal. E a iso aspira a converterse o centro. Por outra banda, a universidade abre unha serie de posibilidades como é a investigación, e froito desta nova natureza poderemos acceder a outras cousas ás que a día de hoxe non temos acceso.
“A ausencia de titulación universitaria provocaba que algúns dos nosos posibles alumnos saíran a estudar fóra”
—Una vez firmado o convenio entre a Xunta e a USC, cales son as próximas fases para a posta en marcha do grao oficial?
—Temos a memoria xa elaborada e agora empeza a tramitación: presentaremos ese documento definitivo á Universidade para a súa aprobación en consello de goberno, de aí tramitarase á Secretaría Xeral de Universidades e, de aí, ao Ministerio. Abrirase un período de alegacións, haberá que responder a elas e a continuación volvería ao Sistema Universitario de Galicia (SUG), que é quen determina de xeito definitivo a validación do título e habilitará para impartilo no curso 2022-2023.
—Que enfoque se lle quere dar a ese novo grao?
—O itinerario de xestión hoteleira mantén o espírito dos actuais estudos que oferta o centro —unha titulación propia en xestión hoteleira— porque é un programa contrastado e avalado polo mercado. Tamén se mantén a importancia da práctica e, nese sentido, apóstase polas materias duais, coimpartidas e coavaliadas por profesorado e tamén por profesionais do sector. Este espírito da dualidade estará moi presente nos dous itinerarios do grao, tanto no de xestión hoteleira como no de innovación gastronómica.
Ademais, en gastronomía apóstase por considerar á industria agroalimentaria e o perfil de cociñeiro que queira colaborar ou traballar en colaboracións con esa industria. Cremos que é un perfil moi necesario que o mercado está a demandar e non temos a nivel académico esa figura. Outro aspecto importante do novo grao é que dará acceso a alumnos e titulados con Diploma Superior de Xestión Hoteleira, título de carácter propio que imparte o CSGH, a través de convalidacións.
“A oficialidade permitirá a internacionalización o centro, tanto no curricular como para incentivar as colaboracións”
—O reto inmediato é pechar o proceso para a obtención da oficialidade. A partir de ahí…
—Aspiramos a converternos en centro de referencia a nivel gastronómico e que o sector poida acudir a nós. E que, como froito disto, xurdan moitas colaboracións. Por outra parte, a oficialidade é unha pasarela para materializar doutra forma a internacionalización do centro, a nivel curricular para os nosos alumnos e a nivel de colaboracións do centro. Máis que nunca, o reto é estar en contacto co sector: a dualidade será beneficiosa tanto para o sector como para nós porque é unha vía para a actualización permanente.
—Outra cuestión de actualidade do sector é o impacto da Covid-19. Como está a afectar á actividade do centro?
—Este ano estamos máis preparados porque desde o inicio do curso temos todos os protocolos de boas prácticas ante a Covid e mecanismos de prevención, así como un plan de continxencia para que nun momento de peche saibamos como proceder. Desde o día 1 de febreiro mantemos a actividade telemática e, como de momento o parón de clases presenciais ten como data de finalización o 17, retomaríamos a actividade a partir de ese día. Durante estas dúas semanas unificamos a teoría, para dala toda xunta en vez de facer a habitual rotación dunha semana de teoría e outra de práctica. Á volta temos previsto recuperar toda a parte práctica pero, se o parón se estende no tempo, teremos que buscar outras alternativas.
Un aspecto que se está a ver moi afectado son as prácticas en empresa. Estamos nun momento moi difícil no noso sector e o que non está pechado está medio aberto ou menos que medio, con moitos traballadores en ERTE. Nestas circunstancias, acoller alumnos en prácticas é moi complicado.
—A Covid tamén ten provocado cambios no sector. Como se están a incorporar eses cambios na formación ao alumnado?
—Se nós formamos profesionais do sector e o sector está aplicando determinadas indicacións por parte de Sanidade e autoridades competentes, os nosos alumnos téñenas que coñecer. E nós xa as aplicamos no centro, internamente. Ademais, movementos como outras modalidades de servizo que se están a adaptar para poder sobrevivir a esta pandemia, como é o caso do take away e o delivery tamén se están incorporando. Parece que son practicas que veñen para quedarse e creo que o feito de que agora a oferta de take away sexa tan diversa é algo que suma, que a nivel de consumidor beneficia moitísimo.
Está nacendo un tecido empresarial que dá cobertura a esta necesidade emerxente. É algo que existía desde hai moito tempo, pero é certo que en Galicia os novos axentes que se teñen sumado a esa nova corrente téñeno feito moi recentemente e con motivo da pandemia.
Deixa unha resposta