A receita da masa das empanadas de Galuriña ten a súa historia. Un cura de Esteiro cedéralle ao pai de Carmen Sánchez uns libros moi antigos antes de morrer. Cando estaban a gardar estes exemplares, deles caeu un anaco de papel que levaba unha serie de ingredientes e un proceso que resultaba moi estraño nestes tempos. Esa fermentación era a que antigamente levaban a cabo os mariñeiros cando saían á mar para que a masa do pan tivese máis tempo de caducidade.
Da investigación en documentos do século XIX partiu este proxecto nado na ría de Muros e que Carmen Sánchez iniciou hai xa case 7 anos. “Cando lín o que poñía o papel da receita, parecíame imposible que unha masa saíse de aí. O que me chamou a atención foi que o fermento o preparaban eles, a man. Chea de curiosidade por tal achado, preparei a masa, pero dándolle un toque máis moderno. Probei a facela cunha pequena renovación e gustoume”. Emprega un fermento que realiza o proceso de fermentación dun xeito tradicional e permite que a masa aguante máis tempo e crocante. “Tamén debe influir que empreguemos as algas”.
Traballan con cinco tipo de algas pero é a nory a que vai xa na masa, e todas contan coa certificación do CRAEGA
E é que as Marucas, este o nome que levan algunas destas empanadas ecolóxicas, contan coas algas e con materia prima galega. Galuriña é unha empresa especializada en empanadas de algas ultraconxeladas con peixes, mariscos e gama vegana. Traballan con cinco tipos de algas: Himanthalia, wakame, ulva, nory e codium; todas elas certificadas polo CRAEGA.
Comercialízanse en 4 tamaños e 6 sabores: mexillón, polbo, berberecho, atún, xarda e vegana. Nas vexetais empregan cogomelos, algas e unha mestura da horta do mar e da terra con algas e xudías verdes. Os formatos segundo peso son: marucón, maruca, maruquín e maruquiña, que ten forma de vieira de Santiago. “O formato de pez foi por dar un pouco de vida ás empanadas”. Unha das fariñas que usan está moída en muíño de pedra. “É moi importante as fariñas que se empregan. As miñas masas levan aceite de oliva, fariña de calidade e as algas nory”.
Empanada Maruca con forma de peixe
As algas, peixes e mariscos utilizados nas súas empanadas procésanse inmediatamente despois da recolección, no seu punto óptimo de frescura e maduración. Este é un modelo de negocio complexo ao tratarse dun ultraconxelado. Dar a coñecer o mundo das algas é complicado. Despois está a percepción no mundo ecolóxico de que o ultraconxelado é un produto de menos calidade, cando isto non é así. Estamos a falar dunha forma de conservación, quizais a máis natural posible, que permite que as calidades organolépticas permanezan no mellor estado.
“Hai que ir ensinando isto aos consumidores finais. A ultraconxelación non ten nada que ver coa conxelación. En cinco segundos está a empanada conxelada. A conxelación consiste en algo moi diferente, trátase dun proceso moito máis lento, que fai que se perdan propiedades do produto. Antes conxelábanse os produtos que xa ían caducar. Aquí se ultraconxela no mellor momento de frescura de cada produto dos que empregamos nas empanadas”, asegura a muradana.
Empanada de mexillóns de Galuriña
As empanadas de Galuriña ultraconxeladas poden aguantar 18 meses, e unha vez que as cociñas teñen 8 días de vida útil. Hai anos, Carmen Sánchez deuse conta de que se quería emprender o seu proxecto empresarial, tiña que ser diferente. E a diferenza márcase desde o uso de algas nos seus productos ata a masa das empanadas un tanto diferente. Tamén pola forma das mesmas, nada habitual (en forma de peixe, de mexillón ou de vieira).
Galuriña empezou coa idea de ser unha empresa de conservas artesanais. Tras pasar por problemas burocráticos, para esta aventura trocaron o pensamento de inicio un pouco por casualidade. Facendo unha proba cunha empanada de algas para uns amigos, Carmen pensou que podía dar pasos no camiño de facer un plan de explotación de algas. Tamén este modelo de negocio tivo as súas dificultades burocráticas, pero agora ela mesma apaña as algas que levan as súas empanadas.
Carmen Sánchez apañando algas na ría de Muros
Despois de estar na primeira feira ecolóxica empezaron as boas noticias.“Agora o ecolóxico empeza a entrar ben, pero hai falta de provedores do ecolóxico. Cando es pequena non confían en ti. Non hai aposta polos que empezan. A inversión é moi alta”, asegura esta pequena empresaria.
O pasado mes estiveron presentes en Madrid Fusión. A chef Nelssy Soriano, de Gastroteca, foi a anfitrioa das empanadas de algas. Tamén fan empanadas de forma rectangular que vende a hostaleiros. Neste momento está a traballar cun novo produto que son as pizzas. Leva alga nory na súa base, e tamén fará unha pizza vegana coas catro algas restantes que emprega na súa produción. Tamén ten previsto comercializar unha pizza catro queixos e outra de xamón serrano ecolóxico.
Ademais, Galuriña vende as masas por separado para que aquel que queira poida facer o recheo ao seu gusto. Agora mesmo a expansión comercial desta pequena firma de Muros foi máis aló de Galicia, e xa podes atopar estas empanadas con algas na súa masa en Barcelona, Madrid, León e internacionalmente xa saíu a Italia, Alemaña e mesmo Hong Kong.
Deixa unha resposta