Descobren unha bacteria que reduce a toxicidade do glute

Investigadores da Universidade de Sevilla identificaron un microorganismo que degrada e neutraliza os compoñentes dos cereais que danan aos celíacos

Os resultados do traballo supoñen un paso máis na redución de glute en produtos de trigo ou cebada.

A comunidade científica continúa buscando alternativas aos produtos que conteñen glute, un problema que afecta en España a un neno de cada 71 e a un adulto de cada 357, segundo a Sociedade Española de Gastroenteroloxía, Hepatoloxía e Nutrición Pediátrica.

Nun estudo publicado na revista PLoS ONE, un grupo de investigación da Universidade de Sevilla en colaboración coa empresa Biomedal, confirmou que unha bacteria diminúe o contido de glute tóxico en cereais. En concreto, neutraliza a maior parte das proteínas responsables da resposta inmunitaria da celiaquía, unha enfermidade crónica frecuente na poboación. Estes resultados, obtidos no laboratorio, supoñen un paso máis na redución de glute en produtos de trigo ou cebada.

Moitos dos alimentos aptos para celíacos non chegan a estar libres por completo de glute

Para iso, os investigadores lograron illar e caracterizar por primeira vez unha encima chamada prolil- endopeptidasa (PEP) a partir da bacteria Chryseobacterium taeanense sp 2RA3. Esta encima foi quen de reducir nalgúns cereais e produtos derivados, como a cervexa, o contido dos chamados péptidos inmunogénicos de glute (GIP) que son fragmentos de proteínas resistentes á dixestión gastrointestinal e que desencadean as reaccións inmunitarias en pacientes celíacos. Expresaron esta encima na bacteria Escherichia coli.

“Concretamente, consideramos que a encima PEP 2RA3 debe combinarse con outras encimas específicas para alcanzar a eliminación completa de GIP na materia prima ou durante o procesamento de alimentos, xa que non pode quedar nada no produto final para ser adecuado e seguro para celíacos”, afirma a investigadora da Universidade de Sevilla María de Lourdes Moreno, autora do artigo.

Aínda que xa é frecuente atopar na etiquetaxe dos produtos a cantidade de glute que conteñen, é difícil determinar a totalidade inxerida polos celíacos na súa dieta diaria, xa que moitos dos alimentos aptos non chegan a estar libres por completo desta substancia.

“Por iso, consideramos a necesidade do uso de encimas como aditivos ou auxiliares tecnolóxicos na industria alimentaria, ben para eliminar da materia prima as proteínas tóxicas que provocan a reacción inmunitaria do glute ou como terapias orais non dietéticas para pacientes celíacos, que eviten os efectos dun consumo mínimo”, engade a científica.

En busca do neutralizador perfecto

O estudo unificou traballos de microbioloxía, biotecnoloxía e xenética. Por unha banda, a localización de cepas bacterianas con actividade glutenasa abre novas posibilidades na investigación sobre a degradación e neutralización do glute a partir de organismos vivos.

Ademais, a investigación incluíu tecnoloxía creada noutros laboratorios andaluces. Concretamente, a bacteria foi encapsulada en microesferas de hidrogel mediante un método chamado Flow Focusing que logra microencapsular calquera tipo de substancia a un nivel micrométrico. Posteriormente, engadiuse a gliadina, un dos compoñentes máis tóxicos do glute, e observouse como se reduciu por completo durante un período de 48 horas despois da incubación.

O obxectivo é lograr o aditivo idóneo para obter produtos libres de glute con todas as garantías necesarias para os celíacos

Doutra banda, o equipo realizou a caracterización xenética da PEP, que foi depositada no Genbank, a rede pública de secuencias xenéticas do National Center for Biotechnology Information de Estados Unidos e que está integrada tamén por bases de datos de Xapón e de Europa.

Os expertos compararon os resultados coa acción doutras encimas bacterianas coñecidas e lograron, mediante expresión recombinante, que a encima da bacteria Chryseobacterium taeanense 2RA3 fose sintetizada por E. coli, para un mellor manexo e produción biotecnolóxico. Para confirmar a redución de GIP utilizáronse unhas tiras chamadas GlutenTox, similares a un test de embarazo, e que son específicas para o recoñecemento destes GIP.

O grupo de investigación continúa explorando novas combinacións destas bacterias que permitan reducir completamente o contido de cereais que provoca a reacción inmunolóxica co obxectivo de lograr o aditivo idóneo para obter produtos libres de glute con todas as garantías necesarias para os celíacos.

Deixa unha resposta

O teu enderezo electrónico non se publicará Os campos obrigatorios están marcados con *