A potaxe de garavanzos con ‘chourizo’ vexetal é posible. Un prato tradicional de culler pasado polo filtro vexetariano. Desde o pasado ano, Calabizo decidiu buscar unha forma coa que gañar clientes entre as persoas que non teñen tempo ou ganas de cociñar pero queren alimentarse dunha maneira saudable. Para iso decidiron elaborar un prato preparado dos de “quentar e listo”.
A potaxe de garavanzos con Calabizo vén sendo a primeira potaxe vegana e ecolóxica, tratando de manter todo o sabor da potaxe tradicional. “A comunidade veggie, e tamén a non veggie, poden xa gozar de forma saudable e saborosa dunha potaxe vegana grazas ao noso ingrediente Calabizo, o noso embutido de cabaza, que lleconfire todo o sabor a esa potaxe de sempre”, comenta Keila Pousa, directora de Marketing de Calabizo.
Este é un produto elaborado de forma artesá con ingredientes naturais e de primeira calidade, no que unha das súas ferramentas de venda advirte de que evidentemente non leva colesterol.
É a primeira potaxe vegana e ecolóxica pero tratando de manter o sabor da tradicional
Con certificación vegana e ecolóxica, para tranquilidade dos consumidores que elixen alimentarse desta forma sen renunciar aos sabores de sempre. Conscientes de que non sempre alimentación vegana é sinónimo de alimentación saudable, resaltan deste produto que, á parte de ser vegano, ten “ingredientes de verdade, todos eles recoñecibles e que encaixan á perfección co movemento realfooding que xorde para as persoas que desexan saber o que comen, entendendo os ingredientes que aparecen na etiquetaxe dos produtos”.
Esta potaxe leva garavanzos, cebola, tomate, cenoria, aceite de oliva virxe extra, pemento, espinacas, Calabizo: embutido de cabaza, 100% vexetal, auga de cocción, allo e sal. Cun consumo preferente de 3 anos, preséntase en tarro de vidro, con capacidade de 440 ml. Unha boa ración se é prato único para unha persoa, e dúas racións como entrante para compartir. Unha vez aberto pódese conservar en frío ata 2 días. “Á xente o que lle costa é entender que isto é unha comida preparada vegana. Ese é o noso principal cliente. Pero tamén queremos que o consumidor non vegano probe. Con isto pretendemos axudar a reducir o consumo de proteína animal”, comenta Keila Pousa.
Polo momento está presente en feiras de alimentación, pero tamén en moitos dos 1.000 puntos de venda de Calabizo
Ata o de agora este novo produto está presente en feiras de alimentación, pero tamén en moitos dos 1.000 puntos de venda onde xa existía Calabizo. A súa expansión internacional xa fixo que entrara en países como Reino Unido, Francia, Alemaña e Canadá, onde aparece a etiquetaxe cos dous idiomas oficiais inglés e francés. O camiño dos pratos preparados non rematou aquí, porque a súa idea é sacar agora outro prato no que combinen as fabas ou as lentellas co Calabizo feito con cabazas galegas case na súa totalidade, salvo en épocas de escaseza, que botan man de cabazas estremeñas.
A historia do nacemento de Calabizo
O Calabizo xurdiu da man da innovación e a tradición, xa que bebe directamente dos chourizos cabaceiros que se fan en zonas do interior de Galicia, como en Valdeorras. Alí o típico chourizo ceboleiro ten un recheo que en lugar de cebola leva cabaza. Eran como os chourizos de segunda. Os bos levaban a mellor carne do porco, e cando quedaba pouca, era cando a combinaban cun vexetal. Isto aínda se fai a nivel caseiro. Están tamén os chamados chourizos de boche (pulmón, papada, cabaza…), tamén lles chaman chourizos fariñentos, e noutros lugares de España fan as morcillas de cabaza, o farinato en Salamanca, ou a pataqueira estremeña de cabaza.
Sofía Calvo, unha das tres socias fundadoras desta empresa xunto a Keila Pousa e Edurne Sendra, era de familia con chacinerías en O Barco de Valdeorras. Con todo, a vida levaríalle polo mundo da cociña. Comezou a súa andaina nun restaurante vexetariano. A pesar de que a oferta gastronómica foise adaptando nos últimos anos ao público vexetariano, ata a creación de Calabizo, este colectivo botaba en falta un sabor que tivese algo que ver co xamón, ou co chourizo.
Keila Pousa, Edurne Sendra e Sofía Calvo, creadoras de Calabizo.
Sofía pensou nos chourizos da súa terra, e en retirar os ingredientes de orixe animal engadindo máis cabaza, e aceite de oliva virxe extra. Non inventou nada, senón que variou unha receita intercambiado proteína animal por proteína vexetal. Unha volta de porca a un chourizo que xa existía. Un produto moi específico, pero con moito potencial.
Puxeron en común as súas distintas áreas de coñecemento: restauración (Sofía), enxeñería agrónoma (Edurne), e márketing e turismo (Keila). Máis tarde, despois de máis dun ano de traballo, conseguiron ser finalistas de Vía Vigo, que agora vén sendo o Vía Galicia, o que lles deu o impulso definitivo para facer realidade a súa idea. Daquela chamábano o embutido vexetal, o que logo foi coñecido como “chourizo vexetal”. O 1 de setembro de 2015 comezaron a vender Calabizo, que se fai dunha forma artesá. Despois chegou a versión picante, ou a liña ecolóxica coa certificación de CRAEGA, e agora este prato preparado de potaxe con garavanzos e Calabizo.
Ademais, tamén chegaron os premios. O Clúster Alimentario de Galicia outorgoulles o premio ao Produto Innovador de 2016, e hai só un ano recibiron o premio á Startup máis innovadora no Culinary Action Startup Prizes do Basque Culinary Center.
Deixa unha resposta