Galicia conta desde 1998 cunha empresa punteira na comercialización de algas como é Porto Muíños. Máis de 300 toneladas recollidas cada ano fanlle ser un referente no mercado europeo de venda de algas, e xa están presentes en máis de vinte países no mundo. A firma de Cerceda vén de recibir o pasado mes de decembro o premio da Revista Origen ao mellor produto, pola súa innovación constante. Este mes estiveron presentes en Madrid Fusión, e son xa unha referencia cando un fala de algas na gastronomía.
Rosa Mirás e Antonio Muíños levan esta empresa familiar que traballa conxuntamente con Universidades como as de Santiago ou A Coruña, ou a de Veterinaria de Lugo. Son algúns dos socios cos que levan colaborado nas súas liñas de investigación en proxectos que non pararon nestas máis de dúas décadas. Agora mesmo están a traballar con sementes de ourizo de mar, nese esforzo pola sostibilidade que fixo que centraran nos cultivos a súa liña de investigación. Na actualidade teñen tres algas en cultivo, pero queren facer o dobre nunha planta que xa posúen en Sada. Pretenden poder ter algas fóra da época natural, o que aumentaría tamén o seu consumo.
Neste ano están a piques de lanzar ao mercado un snack de codio saudable, que nutricionalmente é moi completo. Tamén sopas que van presentar para a terceira idade, variedades de arroces deshidratados, onde combinan a posibilidade de facer albafaca ou remolacha con algas, ou uns aceites aromatizados con algas. “Para que a xente consuma algas en fresco temos que lle dar ideas de como utilizalas sen querer cambiar as receitas familiares, e ensinar que teñen un campo máis”.
No 2020 van lanzar ao mercado un snack de codio saudable, e están a traballar con sementes de ourizo de mar
Este bo traballo fixo que andivesen moi pendentes deles a nivel europeo. Veñen de recibir visitas de Noruega e Irlanda. “Aínda que xa se facían cousas en Irlanda e Francia, esta apertura de novas algas provoca captar moita atención, e que se estean producindo avances moi interesantes no campo das aplicacións. Isto vai crear postos de traballo e novas oportunidades de negocio”, comenta Antonio Muíños. Porto Muíños son 30 persoas, pero van ampliar o seu cadro de persoal nesa procura no mundo dos cultivos de novas especies domesticadas, tras a creación dunha nova nave cuxa ubicación están ultimando. “Levamos moitos anos traballando na investigación de produtos e cultivos. Falta dar forma industrial a algunhas desas ideas”.
O sector das algas está crecendo a un ritmo rápido, tanto que xa non son algo estraño para as familias. Antonio Muíños considera que tiveron a sorte de contar co apoio dos grandes cociñeiros para construír unha cultura do consumo de algas. “Antes, cando se falaba disto, todo o mundo pensaba en cociña xaponesa. Agora empezaron xa a utilizala en restaurantes de a pé, e hai un público que xa busca algas nos supermercados, onde tamén nos fixeron un oco para expoñelas. A xente empeza a falar de pratos tradicionais con algas. Pola tendencia que existe hacia a alimentación saudable, creo que isto viu para quedar”.
As algas xa se converteron nun prato con tradición en moitas cociñas galegas
A pesar destes avances, Muíños segue vendo que lles quedan pasos por dar. “Quizais o que nos falta aos que vivimos disto é saber contar como utilizalas. Que alga ten máis tempo de cocción, cal ten máis sabor a mar, explicar que non todas as algas serven para facer un revolto, nin todas son boas para facer unha empanada. En tres ou catro anos seremos capaces de que a xente teña coñecemento de como manexar dez ou doce variedades de algas perfectamente”. En Porto Muíños traballan con máis de vinte variedades de produtos da horta do mar.
As algas teñen vitaminas, proteínas e un valor nutricional moi alto. Moitas delas combinan perfectamente. Facer unhas lentellas con algas, un caldo incorporando wakame, ou unha menestra con verduras de mar e de terra, son combinacións que se están dando xa na cociña galega. “O espaguete de mar, se o pos con verduras, a xente pensa que se trata dunha xudía de terra. Non ten ningún sabor a mar, e sen embargo o valor nutricional no que se refire a ferro ou calcio, é espectacular. Incluso para cocer uns percebes, metes un chisco de algas na auga, e xa é como se nos trasladara ao mar. Cando entras nunha panadaría, hai un ambiente que te transforma. Coas algas pasa o mesmo”, sentenza.
Deixa unha resposta