Espumosos galegos que se venden en Champagne

Sobre os xacementos das minas de ouro romanas atopamos os viñedos da adega Roandi, que elabora tres variedades de 'brut' coa denominación de orixe Valdeorras

Os viñedos de Roandi están plantados sobre antigos xacementos de ouro de minas romanas

A colleita de uva deste 2019 en Galicia foi unha das mellores da década. Case 64 millóns de quilos de uva recollidos entre as adegas que pertencen ás cinco denominacións de orixe galegas, segundo os datos da Consellería de Medio Rural. A adega Roandi, que ten case 25 hectáreas de viñedo, recolleu uns 175.000 quilos para a súa produción, máis outro número importante que vende a outras adegas. Roandi é a que máis variedades de espumosos produce en Galicia. Fixo o primeiro espumoso e único no mundo elaborado con uva 100% godello, que está amparado baixo a denominación de orixe Valdeorras, das que teñen unha produción de 30.000 botellas (Brinde de Godello). Recolleron uns 45.000 quilos de uva para poder facelo. Tamén fixeron o primeiro espumoso rosado galego con uva mencía e albarello, do que producen 20.000 botellas (Brinde de Rosas), cuns 32.000 quilos de uva, ademais dun espumoso de viño tinto que é 100% mencía, do que elaboran unhas 10.000 botellas por ano (Brinde tinto de Éntoma), utilizando entre 15 e 17.000 quilos de uva.

Rogelio Moral, un empresario de éxito na emigración, decidiu un día retornar a casa e recuperar os viñedos na súa aldea natal, en Éntoma, no Barco de Valdeorras. Esta adega familiar chegaba a súa cuarta xeración de viticultores. Partindo duns viñedos centenarios dos seus avós, foi mercando parcelas a 150 propietarios diferentes para poder xuntar daquela ata 18 hectáreas. Tras estar como socio da cooperativa durante 50 anos, finalmente no 2005 fusionou as plantacións herdadas cos novos viñedos, deseñados aproveitando as curvas de nivel do terreo. Naceu así Adega Roandi, acrónimo dos nomes dos seus netos (Rogelio, Ángel e Diego) que, xunto co seu fillo José Luís, están incorporados á adega xa coas porcentaxes de propiedade repartidas.

Rogelio Vidal apañando uvas no seu viñedo

Rogelio Vidal apañando uvas no seu viñedo

Rogelio estivera traballando moitos anos en Italia. “Alí o espumoso e prácticamente como o cava en Catalunya. A xente come con el case a diario”. Así foi como empezou o seu interese polo que agora acumula o 15% da produción da súa adega. Foi o enólogo Manuel Losada quen variou a forma de proceder de Roandi en canto a vendima diferenciada por parcelas, pero tamén no terreo da elaboración dos espumosos. Segundo Rogelio Moral aproveitaron moi ben o lugar no que se atopan os seus viñedos, sobre antigos xacementos de ouro romanos, e cunha excelente orientación. “A min gustaríame mellorar algo máis a calidade. Temos moitísimos premios pero creo que aínda podemos facelo mellor”.

A Rogelio gústanlle moito os espumosos que se están facendo en Galicia. Apunta que teñen unha xuntanza en Melide unha vez ao ano na que se reúnen oito adegas, “e a verdade é que agora mesmo facemos cousas como para poder competir”. De feito menciona que puntualmente na súa adega están vendendo espumosos á zona francesa de Champagne, e di que iso é como “venderlle milagres a Deus”. Estes espumosos estanse vendendo tamén por toda España ademais de en Italia, Francia e Suiza. “Hai xente en Francia ou Catalunya, onde producen os seus propios cavas, que demandan o noso espumoso”, recalca a xerente da adega, Margarita Alejandre. Recoñece que é no Nadal onde teñen unha alta demanda, pero tamén asegura que hai clientes que solicitan o espumoso durante todo o ano.

As tres variedades de espumoso da Adega Roandi

As tres variedades de espumoso da Adega Roandi

Estes espumosos son elaborados polo método tradicional champenoise: isto quere dicir que teñen dobre fermentación, na botella e no depósito. Unha vez que fermenta no depósito proceden a metelo nas botellas e engadir os fermentos. Así durante 12 meses mínimo en repouso para despois facer un degole, que consiste en poñer as botellas boca abaixo mínimo un mes, e ir dándolle voltas todos os días. Unha vez que o pouso e a levadura está repousada no pescozo, vai a nunha máquina que fai de conxelador, conxela, e abren e destapan, porque é con chapa. Sacan as levaduras, que é o que sobra, e volven reencher as botellas co propio líquido, polo que cando fan o degole perden unha cantidade importante de botellas. Non utilizan licores de expedición nin sucres engadidos. Recollen a uva godello normalmente un pouquiño antes da vendima porque ten que ter unha gradación específica para poder sacalo como brut. Agora mesmo só están vendendo reservas, non venden viño espumoso xoven.

Deixa unha resposta

O teu enderezo electrónico non se publicará Os campos obrigatorios están marcados con *