Un equipo do Instituto de Diagnóstico Ambiental e Estudos da auga (IDAEA) do Consello Superior de Investigacións Científicas (CSIC) analizou a concentración de mercurio de 58 especies de pescado e marisco de consumo humano á venda en mercados locais de España, Italia e Francia. De todas elas, os exemplares de 13 especies presentaban concentracións de mercurio por debaixo das recomendadas como seguras pola Unión Europea (UE). Entre elas atópanse a sardiña, o bocarte, o ollomol, a dourada e un molusco: a lura.
“Consumir estas especies minimiza a nosa inxesta de mercurio, que é o prezo a pagar ao comer peixe. Ademais, estes peixes teñen unha boa cantidade de ácidos graxos insaturados, que son máis beneficiosos desde un punto de vista nutricional”, aclara Joan O. Grimalt, investigador do IDAEA-CSIC e autor principal do estudo, publicado na revista Environmental Pollution.
O mercurio é un elemento tóxico que dana os riles, pulmóns e o sistema cardiovascular e nervioso, sobre todo de mulleres embarazadas e poboación infantil. Debido ás súas propiedades físico-químicas, o mercurio pode transportarse a longas distancias e depositarse en ecosistemas acuáticos, onde é absorbido por peces e outros organismos. A maioría do mercurio que é inxerido pola poboación humana provén, precisamente, do consumo de peixe e marisco.
Análise de máis de 1.300 exemplares
O estudo céntrase en máis de 1.300 exemplares de 58 especies de peixe e marisco de consumo humano que se atopaban á venda en mercados de España (Menorca, Mallorca, Eivissa, Alacante, Ametlla de Mar e L’Ampolla), Italia (Xénova, Civitavecchia, Alguer) e Francia (Marsella). Outras das especies máis seguras son: lirio, salmonete de rocha ou corvina, entre outras.
“Segundo estes resultados, as autoridades sanitarias deberían prestar especial atención ás especies de peixe e marisco cos niveis de mercurio máis elevados e facer as recomendacións sanitarias preventivas adecuadas, especialmente para as mulleres embarazadas e os nenos”, conclúe Grimalt.
Referencia: Wild fish and seafood species in the western Mediterranean Sea with low safe mercury concentrations (Publicado en Environmental Pollution)
Deixa unha resposta