Os consumidores demandan, cada vez máis, alimentos ambiental e socialmente sostibles. Neste escenario, nos últimos anos proliferaron os produtos que reivindican a súa orixe natural e/ou ecolóxica. Aínda que a produción ecolóxica ou a biodinámica está convenientemente regulada, non é así no caso da natural. Hai moitas empresas que utilizan este concepto na etiquetaxe dos seus produtos. A ausencia de normas específicas que regulen a súa produción provoca que os consumidores outorguen unha gran variedade de atributos a este tipo de produtos.
Ademais, as percepcións do consumidor respecto á importancia destas calidades condicionan os comportamentos de compra e a dispoñibilidade para pagar por estes produtos. Por iso, resulta fundamental para todos os axentes do sector poder identificar as motivacións do potencial consumidor. Un estudo realizado por Ernesto López Valeiras, Eloi Jorge e María Beatriz González, investigadores da Universidade de Vigo, determinou o valor dunha etiqueta que poña natural. Concretamente, preguntáronse que se entende por produto natural? Ata a data non existían traballos empíricos con conceptualizacións amplas e válidas dos atributos de naturalidade.
Para responder a esta pregunta realizaron unha investigación sobre a conceptualización de naturalidade no consumidor e o comportamento deste en función dos atributos aos que asignaba maior importancia. En concreto, centráronse no grupo de consumidores da xeración milenial, impulsores das tendencias presentes e futuras no consumo de alimentos.
Un dos rapaces durante o estudo feito en Ourense
Hai evidencias de que este comportamento é radicalmente diferente ao de xeracións anteriores, pero é que ademais son un grupo da poboación que, segundo os estudos de mercado, dan unha enorme importancia á etiquetaxe: len as etiquetas antes de comprar, utilizan as novas tecnoloxías como o escaneo do código de barras, buscan comentarios doutros consumidores… Trátase de persoas preocupadas polo medio ambiente e polos sistemas produtivos.
Para estudar o comportamento dos milenials levaron a cabo un experimento de mercado con 372 persoas que simulaba unha situación real de compra, pero nun laboratorio da Facultade de Ciencias Empresariais e Turismo de Ourense (Universidade de Vigo) expresamente preparado para este estudo. Os resultados mostran que o concepto “natural” inclúe un total de 9 atributos relativos ao cultivo/cría, así como ao posterior procesamento dos alimentos. A atención a estes factores facilita o entendemento das necesidades e o comportamento do consumidor en relación a este tipo de produtos.
Os atributos relativos ao cultivo ou cría, así como ao posterior procesamento dos alimentos, son os seguintes: produción local, ausencia de ingredientes artificiais, de conservantes, de aditivos, de colorantes e potenciadores do sabor artificiais, ausencia de produtos químicos, hormonas, pesticidas, ausencia de organismos xeneticamente modificados e baixo grao de procesamento. Curiosamente, con respecto a xeracións anteriores, a produción ou o proceso tradicional non encaixa, ou non o asocian, ao de naturalidade.
“Agora mesmo hai unha evidencia de que a gran cantidade de certificados que existen xeran no consumidor ambigüidade”
Agora están analizando se o tradicional fai que estean dispostos a pagar máis ou non por estes alimentos. “Se sabemos que o tradicional non o asocian ao natural, a mensaxe debería ir nesa liña. No momento actual existe evidencia de que a gran cantidade de certificados que existen xeran no consumidor ambigüidade. Danse mensaxes con pouca información, e o consumidor ten que descifrar o que se lles quere vender. Isto pode facer que a actitude de compra varíe. Se non teño clara a mensaxe, podo decidir non mercar”, asegura o investigador e profesor López Valeiras.
O consumo de produtos ecolóxicos está medrando, pero non ao ritmo que se podía esperar nas actitudes dos consumidores. Unha explicación disto pode ter que ver coa “ambigüidade existente” da que fala o profesor da universidade viguesa. “Que sexa ecolóxico, bío ou orgánico en España significa o mesmo. As empresas non poden empregar estes conceptos se non están certificados. O consumidor debe saber que hai detrás para saber que compra”.
O extra prezo que poden ter estes produtos afecta dunha forma diferente aos diferentes colectivos. “As evidencias mostran que este tipo de consumidores veganos ou vexetarianos están aumentando moitísimo. En estudos previos vemos que hai tres razóns para consumir produtos ecolóxicos: porque considera que é máis saudable, porque pensa que respeta o medio ambiente ou porque pensa que poden ter unhas condicións sensoriais maiores, máis saborosos, por exemplo”.
O consumo de produtos ecolóxicos está medrando, pero non ao ritmo que se podía esperar
Ernesto López Valeiras abriu este xoves a segunda xornada da 21ª edición de Xantar en Ourense cunha conferencia na que a súa reflexión final foi que as decisións que toman as persoas, e a forma que temos de interpretar os estímulos, non son sempre obxectivos, xa que hai un filtro. Coñecer e comprender o comportamento é fundamental. Cada vez que tomamos unha decisión de compra hai que pensar en que parte está baseada en visións obxectivas e que parte é unha interpretación nosa desa realidade. Isto é o que trataron de resolver no laboratorio a través de catas a cegas, nas que non existían máis estímulos que os propiamente obxectivos, e con iso trataban de identificar comportamentos.
O Salón Expourense inaugurou onte unha nova edición do Salón Internacional de Turismo Gastronómico Xantar, e xa van 21. Esta vez, con 298 expositores e 9 países participantes, os seus impulsores esperan lograr proxectar o turismo enogastronómico da Península.
Deixa unha resposta