Obxectivo: recuperar o millo autóctono na panadaría tradicional 

Tras un ano de traballo, culmina o proxecto “Tradición e innovación  dos produtos derivados do millo galego”, cuxo obxectivo consiste en promover o uso do millo autóctono para  recuperar a fabricación de produtos de panadaría tradicionais e de calidade.  Promovido por CIFP Manuel Antonio (Vigo), que ten implantado un ciclo de Panadaría, Repostaría e Confeitaría, conta coa colaboración científica do Consejo Superior de Investigaciones Científicas (CSIC), a través do Grupo Xenética e Mellora de Millo da Misión Biolóxica de Galicia (MBG). Nel participan institucións e centros  educativos que impulsan proxectos de emprendimiento no sector panadeiro,

O proxecto baséase na realización de propostas didácticas para o alumnado e en explorar novas fórmulas de fabricación de produtos derivados do millo tradicional. Para alcanzalos, ceunta tamén coa participación da Escola de Canteiros de Poio, o IES de Teis e A Guía e a empresa panificado Amásame. Está financiado pola Xunta, a través da Consellería de Cultura, Educación e Universidade.

O proxecto pon o foco na formación do alumnado, ao que se pretende instruír tanto para a elaboración como para a comercialización deste tipo de produtos. Para iso, abordáronse distintas accións coa colaboración coas entidades participantes. Entre elas, a selección de diversos tipos de millo, o estudo das súas  posibles aplicacións en panadaría, a realización e instalación no CIFP dun forno tradicional e a elaboración de produtos derivados de millo. Tamén se incide na valoración e análise sensorial das probas e no deseño dunha campaña de mercadotecnia e publicidade.

O proxecto pretende mostrar as posibilidades gastronómicas do millo galego, abarcando o ciclo completo

“Pretendíase mostrar as posibilidades gastronómicas do millo galego, abarcando o ciclo completo: desde a selección de sementes até a obtención do produto final, é dicir, desde a produción á comercialización”, explica Luziano Tizado, coordinador do proxecto.

“A nosa participación consistiu, fundamentalmente, nas seguintes acciones: análise das variedades de millo autóctono que mellor se adaptasen organolépticamente aos procesos de panificación, plantación de varios tipos de millo interesantes para o devandito proceso (branco, amarelo, corvo) e doutras específicas para comercializar flocos de millo, millo doce ou consumo en fresco”, explica Pedro Revilla Temiño , investigador científico do CSIC.

Forno tradicional de pedra

O proxecto tamén abarcou a realización e instalación dun forno tradicional de pedra no CIFP Manuel Antonio e a creación dunha app na que o consumidor teña información do produto, así como o deseño e establecemento dun punto físico de venda no centro para que o alumnado faga prácticas de venda e comercialización, asi como o o deseño dunha campaña de mercadotecnia e publicidade enfocada aos novos consumidores.

“Tras este proxecto, establecemos unha colaboración coa que pretendemos desenvolver produtos de panadaría tradicionais e novos, de calidade e susceptibles de ser comercializados por panadeiros innovadores”, destacan desde o CSIC e o CIFP Manuel Antonio.