Os panadeiros galegos reclaman unha nova lei do pan

Seis meses despois da posta en marcha do Real Decreto, en Galicia non se notaron modificacións nas panadarías

Cando se cumpren 6 meses desde que entrou en vigor o Real Decreto que modifica parte da antiga lei do pan, a sensación dos panadeiros galegos é de que nada mudou. Os cambios aínda están por vir, e o sector segue a necesitar máis variacións nunha lei que consideran xa quedou desfasada, xa que é de 1984. Coinciden en apuntar que as panadarías que estaban facendo as cousas ben seguen igual, pero puntualizan que os que pretendían dar gato por lebre continuan cos seus enganos. De feito as esperanzas de cambio das panadarías galegas pasan máis pola aprobación da marca ‘pan galego’ coa súa IXP, que polas reformas feitas a nivel estatal.

Daniel Pampín é vogal de Aproinppa e dono de Amásame Bakery Lab en Pontevedra. Ao seu xuízo os cambios quedaron curtos e reclama unha lei máis estrita e controladora, que permita vixiar o cumprimento de moitas das modificacións ás que facía alusión a nova normativa. Unha delas tiña que ver coa masa nai de cultivo ou non. “Non hai inspectores en traballo como para poñelos a controlar as masas nai, por iso o que dicía a nova normativa soaba a conto desde o principio. En Galicia non se notou nada. E unha mágoa porque ao final depende todo da honestidade do panadeiro, e da cultura do cliente para diferenciar o que lle venden”, comenta o membro da Asociación Provincial de Panadaría e Pastelaría da Provincia de Pontevedra. Pampín afirma que é moi “pro auditorías” pero que “ata hai moi pouco era imposible atopar un pan que fose 100% integral”, a pesar de que se vendía como tal.

Recoñecen que ata hai pouco era imposible atopar un pan que fose 100% integral aínda que se vendían como tal

Na mesma liña vai Marcial Grela, presidente de Aprofar, que considera que a única variación que notaron é que “poñemos letreiros nos que especificamos que é integral ao 60 ou 75%, ou 100% espelta, pero salvo iso o resto non cambiou nada. Segue habendo moito fraude”. Unha variación que lle parece obviaron na lei é a de sinalar tamén o pan que é conxelado e o que non, cando resulta que o 50% do pan que se vende en España vén procedente das panadarías dos supermercados.

Por iso na opinión dos panadeiros o ideal sería plantexar unha lei nova por completo. E para iso hai moitos paus que tocar, según Daniel Pampín. Por unha parte está a formación dos panadeiros. “Estamos en Europa para unhas cousas pero para outras non. Temos que empezar a regular a titulación da xente que traballa nas panadarías. A base de todo é a formación, porque se estás instruído para facer un bo pan, vas respetalo”. Admite que este Real Decreto foi un primeiro paso e que quizais dentro de catro ou cinco anos poida mellorar realmente a situación. Este membro de Aproinppa recibiu parte da súa formación en Alemaña. Asegura que alí é obrigatorio ter unha preparación como mestre panadeiro para abrir a túa propia panadaría, figura que en España non existe, a pesar de que o decreto lei falaba dela.

Insisten na necesidade de esixir unha titulación para aqueles que queiran abrir unha panadaría

O presidente da Asociación Provincial de Forneiros Artesáns de A Coruña, Marcial Grela, incide na necesidade de dar un certificado de profesionalidade, como o que xa están outorgando na escola de Aprofar nos cursos que ofrecen para persoas desempregadas. “Non é lóxico que un fontaneiro teña unha titulación e o panadeiro non. Non era unha esixencia para montar unha panadaría ter unha titulación, e debería sela”.

Outro cambio que consideran importante sería modificar as condicións de traballo. Hai panadeiros que están comezando a súa xornada laboral xa antes das doce da noite. “Ofrecendo esas condicións, quen quere traballar nunha panadaría. Ademais de que os salarios son moi axustados. Agora mesmo se eu teño dez panadeiros, coloco os dez, pero non atopamos xente que queira traballar tal e como está o sector”, comenta Daniel Pampín e refrenda Marcial Grela, que asegura que “cos horarios dunha panadaría non é sinxelo convencer á xente nova de que colla este traballo”. Así mesmo recorda que o pan que se fai en Galicia, coas fermentacións longas que leva, necesita moito tempo, aínda que agora apareceron técnicas novas para avanzar nisto coa fermentación retardada.

Unha das bases deste pan galego é que teña cereal propio. Coa IXP do pan galego esperan que se consiga que o noso pan teña máis trigo autóctono, aínda que este proceso vai necesitar tempo. Pampín recoñece que é culpa dos propios panadeiros xa que “aos que compramos a materia prima non nos gusta pagar demasiado, e se non pagamos o agricultor galego non planta, e se non planta non temos cereal propio para facer pan galego”. Mentres, Grela avanza que xa están facendo o Consello Regulador do pan galego e que pensa que esta IXP pola que tiveron que esperar 21 anos, vailles permitir melloras do tipo de que se deixe de vender como galego pan que non o é, ademais de que “poderá abrir as portas ao campo co cultivo de cereal propio, pero fai falta tamén que o panadeiro o reclame”, puntualiza.

Deixa unha resposta

O teu enderezo electrónico non se publicará Os campos obrigatorios están marcados con *